SumTrans har fått ny leiar

Åge Johnny Kalstad har takka ja til å leie sjåførane i SumTrans på riktig veg. Med det sikra dei 30 års leiarerfaring inn i selskapet.  

—    Renovasjonsbransjen er ein spennande og framtidsretta bransje å gå inn i. Det vil jo aldri bli tomt for avfall, så det er ein sikker jobb å gå til. Eg ser at SUM er i stor utvikling, og det blir lærerikt å vere ein del av den omstillingsprosessen som no skjer, seier Kalstad.  

SumTrans er dotterselskapet til Sunnfjord Miljøverk. Ein viktig del av den nye jobben til Kalstad er å sørge for god flyt mellom dei to selskapa. Erfaringa hans tilseier at det kjem han til å meistre med glans.

Nytt område innan logistikk

Den største delen av arbeidslivet sitt har han hatt i Posten, men dei siste fire åra har han vore dagleg leiar i  Hoff og Knutson Transport AS.  

—    For meg er dette ein ny del av logistikkverden. Eg har mange års erfaring frå stykkgods, men renovasjonsbilar er eit heilt anna område. Det syns eg er utruleg spennande å ta fatt på, seier han.  

Brennheit CV

Han skildrar seg sjølv som ein allsidig type. Det ser ein igjen på CV-en hans, der både brannmann og leiarerfaringar på fleire nivå er lista opp.  

—    Eg har vore leiar i snart 30 år, og likar å vere i alle ledd. Eg har ingen problem med å bli skitten på hendene eller å sitte i kontorstolen. Den allsidigheita trur eg blir viktig i jobben, seier han.

Strategiplanlegging på solsenga

Vidare presenterer han seg som ein innbarka førdianar som er god til å ta imot mykje informasjon på kort tid. No er det snart ferietid, men han avslører at ein del av ferien vil gå til strategiplanlegging for den nye arbeidsplassen.  

—    Eg er ein tenkar, og har allereie begynt å gruble litt over enkelte problemstillingar i bedrifta. Og så er eg svolten på å kikke litt inn i datasystema dei brukar. Det blir kjekt å komme i gong til hausten, avsluttar han.  

 Solid og riktig kompetanse

Øystein Hunvik er styreleiar i SumTrans. Han er svært nøgd med tilsettinga.  

—    Kalstad har ei fantastisk brei og relevant erfaring. Han har solid bakgrunn frå transportbransjen, og han kan HMS, HR, økonomi og har teknisk kompetanse. I tillegg er han ein erfaren leiar. Det er rett og slett ei kjempetilsetjing for oss, seier ein nøgd styreleiar.  

Han er ikkje i tvil om at han er riktig person for jobben.  

—    Eg trur at han kjem til å utfordre oss ein del, og det har vi berre godt av. Resultatet av det er at vi kan levere enno betre tenester enn vi gjer i dag, samtidig som vi held kostandane nede. Det vil totalt sett gjere SumTrans og SUM til ein betre aktør, avsluttar han.  

Kalstad startar i stillinga 1. september.  

Feilsortering er daglegvare

Det er viktig at kundane våre nyttar seg av desse posane til matavfallet sitt. For ordens skuld: maten på bilde er ikkje klar for dunken enno. Det er berre epleskrott, druestilk og eggeskal som skal i posen (resten skal i magen).

Vi kan ikkje tømme matavfallsdunken din om vi ser at den inneheld bioposar. Bioposane er seige og heng seg opp i maskinene til anlegget vi leverer matavfallet til.

Renovatørane våre sjekkar tilfeldige dunkar før dei tømmer. Det vil seie at dei opnar lokket og ser over innhaldet. Grunna HMS har dei ikkje lov til å ta ned i dunken, og dei kan derfor ikkje ta ut plast og anna avfall som er feilsortert.

Varme frå epleskrott

Matavfallet ditt blir frakta til Grødaland biogassanlegg på Jæren. Der blir det brukt i produksjon av biogass og biogjødsel. Biogass er ein fornybar energikjelde som vi kan bruke til elektrisitet, varme og drivstoff, medan biogjødsel er ein verdifull ressurs for landbruket.  Med andre ord er matavfallet ditt ein viktig ressurs. Kvar epleskrott teller!

Papirposane er svært miljøvenlege

Papirposane er spesiallaga til matavfall og toler ein del fukt. Likevel er det lurt å la matrestane tørke før du kastar dei i posen. Fukt- eller fettflekkar er heilt normalt. Det betyr ikkje at posen kjem til å rivne. Dersom du er usikker, kan du eventuelt bruke ein ekstra papirpose utanpå.

Tom for matavfallsposar? Her er oversikt over kor du kan få tak i fleire.

Papirposen er eit svært miljøvenleg alternativ. Den er 100 % fornybar og utgjer ingen risiko for å spreie mikroplast til landbruket. Vi forstår at det kan oppstå litt irritasjon rundt dette, men med nokre enkle grep kan prosessen gå litt lettare.

• Unngå matsvinn! Kjøp det du skal bruke, et opp og ver kreativ med restane. Då får du rett og slett mindre matavfall.

• Bruk den grønne korga med luftehol. Dersom du ikkje har korg kan du hente på kontoret vårt i Elvegården eller på ein av gjenvinningsstasjonane våre.

• Supper og anna avfall som er veldig vått kan du kaste i restavfallet.

Dropp blomster og potteplanter

Biogjødsel skal betre kvaliteten på jorda som blir brukt i matproduksjon. Planter og blomster kan innehalde sprøytemiddel og stoff som ikkje er eigna i denne type gjødsel for jordbruk. Derfor må du kaste blomster og jord i restavfallet, eller levere på gjenvinningsstasjonen som hageavfall.

Nysgjerrig på kor avfallet ditt hamnar? Les om det her: Dette skjer med avfallet du leverer — Sunnfjord Miljøverk IKS (sum.sf.no)

Vi er i Norgestoppen på plastsortering

Innbyggarane våre er gode på å reingjere og sortere plastemballasje riktig. Dei fortener ei god dose skryt, seier Harald Nyland.

Han er renovasjonsansvarleg i Sunnfjord Miljøverk, og sjølvsagt veldig fornøgd med resultatet av plukkanalysen som vart gjennomført 24. april i år.

Totalt gjekk vi gjennom 388 kg innsamla plastemballasje. Resultatet av dette viste 2,6 prosent forureining. Det er godt innanfor kvalitetsmåla som er 5 prosent.

— Det er meir eller mindre rein plastemballasje som vert samla inn frå innbyggarane her, og det er veldig bra, seier Kristian Nordby, som er prosjektleiar i Plastretur.

Kor reint er reint nok?

Det er mange som lurer på kor rein emballasjen faktisk må vere før den blir kasta. Nordby påpeiker at den bør vere rein og tørr, men at ein må bruke sunn fornuft.

— Dersom det er vanskeleg å reingjere og du må bruke varmt vatn, er det betre å kaste i restavfallet, forklarer han.

Rein plastemballasje

Plastemballasjen vert samla inn saman med dunken for papp og papir. Deretter vert det frakta til Norsk Gjenvinning for vidare sortering.

— Norsk Gjenvinning fortener også skryt, for dei gjer ein veldig god jobb i mottak. Resultata viser lite forureining mellom plast og papp og papir, til tross for at dei vert samla inn samtidig. Dei gjer med andre ord eit veldig bra manuelt arbeid med å sortere ut dei forskjellege avfallstypane.

— Dette er svært gode resultat. Godt jobba!

Kristian Nordby, prosjektleiar i Plastretur

Foto: Beathe Schieldrop

Gjenvunne i Tyskland

Plastretur hentar plastemballasjen hos Norsk Gjenvinning i Førde. Deretter blir den transportert vidare til Tyskland på ein mest mogleg miljøeffektiv måte.

— Per no er det ingen anlegg for gjenvinning av returplast i Norge. Miljøgevinsten ved å kjeldesortere på denne måten er mykje større enn at plasten går til forbrenning her i landet.

Returplast og Tomra har gått saman om å bygge eit nasjonalt finsorteringsanlegg for hushaldningsplast. Det skal etter planen stå klart i midten av 2025, og då kan deler av gjenvinningsprosessen bli løyst her i landet.

Gjenvunne plast kan brukas til blant anna å lage plastposar, avfallssekkar, blomsterpotter, leikestativ eller benkar. Det kan også bli om til ny emballasje.

Framleis ein veg å gå

I 2023 samla vi inn 9,1 kg plastemballasje per innbyggar i dekningsområdet vårt. Det er litt over snittet som er 8 kg per innbyggar frå områda som har Plastretur-avtale.

Ifølge Plastretur må Norge samle inn rundt 16 kg per innbyggar for å nå kravet om 52 prosent materialgjenvinning innan 2030.

— Det betyr at alle må bli endå flinkare på å sortere ut plastemballasjen frå restavfallet sitt. Vi er gode på å levere frå oss rein plastemballasje, men vi har framleis ein veg å gå på å få sortert ut alt, seier Nyland.  

Usikker på kor du skal kaste kva? Sjekk ut sortere.no. Dei har svaret!

Årleg henterunde for farleg avfall

No er tida inne for å rydde boda og garasjen for gammal maling, tomme sprayboksar og andre ting som blir klassifisert som farleg avfall.

Alt du ser på bilde over her er klassifisert som farleg avfall. Dette må du ikkje kaste i restavfallet, men levere på ein gjenvinningsstasjon eller på den årlege henteruta vår. Foto: Photoevent

I månadsskifte mai/juni køyrer vi den årlege henterunda for å samle inn farleg avfall i grendene rundt omkring. Dette er ein tilleggsteneste som er inkludert i det årlege gebyret du som kunde betalar til Sunnfjord Miljøverk.

For å levere farleg avfall til bilen må du

• Møte opp personleg

• Sørge for god merking av det du skal kaste dersom det ikkje er i originalemballasje (bruk tusj og skriv kva innhaldet er)

• Ha med avfall som vi kan laste på bilen utan bruk av maskiner

Vi kan dessverre ikkje ta imot store mengder avfall per person. Dersom du har mykje du vil kaste, ber vi om at du leiger ein konteiner eller leverer det farlege avfallet på ein av gjenvinningsstasjonane våre.

Næringsdrivande må gje beskjed i forkant

Næringsdrivande kan også levere mindre mengder farleg avfall på ruta. Meld inn til Kjell Bu seinast to arbeidsdagar før ruta går. Tlf: 905 02 589 eller e-post kjell.bu@sum.sf.no.

Hugs at du må deklarere avfallet i forkant. Skjema og informasjon om dette finn du på nettsida www.avfallsdeklarering.no.

Dette kan du levere på denne henterunda:

Spillolje, oljefilter, løysemiddel, maling, sprayboksar, kvikksølv, oppladbare batteri, plantevern, herdar, syrer, basar, vaskemiddel, tjære, styren, bilbatteri og brannslukningsapparat.

Dette kan du ikkje levere på denne henterunda

Tomme malingsspann, tomme oljekanner, blanda avfall/restavfall, treverk, plast, flasker, metall, drikkekartong, hageavfall, EE-avfall (elektrisk), kuldemøblar, eksplosiver, sterkt reaktive stoff, smittefarleg avfall, biologisk avfall, radioaktivt stoff, stikkande/skjærande avfall (sprøyter osv.), CCA-impregnert, PCB- og klorparafin-vindauge, asbest.

Er du i tvil om kor du skal levere desse avfallstypane? Ta kontakt med oss på telefon 57 72 41 50, så skal vi hjelpe deg.

Dersom tidspunktet ikkje passar for  deg, er du velkommen innom ein av gjenvinningsstasjonane våre.

Er du vår nye logistikk- og transportsleiar?

Vi søker deg som vil vere ein nøkkelperson i Sunnfjord Miljøverk med det overordna ansvaret for transport og logistikk. Du vil ha det operative ansvaret for dotterselskapet SumTrans og vere ein del av leiargruppa i Sunnfjord Miljøverk.

Kven er du?

Du er ein person med trygg og klar leiarstil. Du må trivast med å jobbe sjølvstendig og effektivt, og like å komme opp med gode og gjennomtenkte løysingar.

Arbeidsoppgåver

• Planlegge og gjennomføre transport- og logistikkoppdrag

• Kartlegge og optimalisere Sunnfjord Miljøverk og SumTrans sine logistikktenestar

• Samarbeide tett med kollegaer/avdelingar og eksterne partar/leverandørar

• Personalansvar i eiga avdeling

• Følge opp kvalitets- og prosessavvik innan eige ansvarsområde

• Sikre at vi imøtekjem lokale og nasjonale retningslinjer og renovasjonsforskrift/rettleiar

• Delta aktivt i innkjøpsprosessar

• Delta aktivt i relevante nettverk

Kvalifikasjonar

• Gode leiareigenskapar med evne til å engasjere, motivere og rettleie

• Relevant utdanning og/eller erfaring innan logistikk- og økonomifag

• Der er ein fordel med erfaring frå transport- og logistikkbransjen

• Du tek eigarskap til oppgåver og evner til å sjå moglegheiter

• Gode kommunikasjonsevner

• Gode it-kunnskapar

Vi tilbyr

• Trygg jobb i ein bransje i utvikling, og ein arbeidsplass i vekst

• Konkurransedyktige vilkår og KLP-pensjon

• Kompetanseheving: deltaking på kurs og konferansar, nettverksbygging og moglegheit til å hospitere hos andre renovasjonsselskap

Sunnfjord Miljøverk (SUM) har eit givande samfunnsoppdrag. Saman med dotterselskapet SumTrans, skal vi sikre gode avfallsløysingar i Askvoll, Fjaler, Hyllestad og Sunnfjord kommune. Akkurat no er det 18 sjåførar som held hjula i gong på SumTrans, og 23 tilsette som jobbar innan drift, renovasjon, økonomi, HR og kommunikasjon hos SUM.

Hovudanlegget ligg på Einestølen (mellom Førde og Naustdal). I tillegg har vi fem ytre gjenvinningsstasjonar. Både SUM og SumTrans har kontorlokaler i Førde sentrum. Samspelet mellom selskapa er viktig. Saman skal vi samle inn avfallet i kommunane, og sørge for at det vert sortert og handtert riktig slik at mest mogleg blir gjenvunne og får ny verdi.

Slagordet «avfall på rett veg» underbygger dette. Vi hentar avfall i alle krinkar og krokar, og sørger for at det hamnar på riktig stad til slutt. Målet er å redusere den totale avfallsmengden for å nå EU sine klimamål. Vi får stadig nye krav og retningslinjer som vi må forhalde oss til. Det betyr at vi heile tida må tenke nytt og finne smarte og gode løysingar for å imøtekomme desse krava. Derfor kan vi trygt seie at vi har ein interessant og utviklande arbeidskvardag.

Om du har spørsmål eller vil høyre meir om stillinga, må du gjerne ta kontakt med Tore Dvergsdal på e-post eller tlf: 951 98 501.

Hugs å søke innan 15. april.

Vant i Returkartonglotteriet

Linda Fleten Snekkevåg har sortert kartongar riktig i fleire år. No har det lønna seg. Foto: privat

Linda Fleten Snekkevåg gjorde ein jobb for miljøet og blei 10 000 kroner rikare.

— Dette var ufatteleg kjekt! Tenk at det går an å vinne så mykje pengar utan å betale for å ta lodd. Det er jo heilt fantastisk, seier den ferske vinnaren frå Fure. 

Returkartonglotteriet har eksistert sidan 1997. Kvart år blir det trekt ut heile 124 vinnarar som delar ein pott på til saman 1,6 millionar kroner. I februar blei Linda sin kartong plukka opp frå mengda.

— Eg har skrive namn og telefonnummer på kartongane i 1-2 år, men må innrømme at eg ikkje har hatt trua på å vinne. I tillegg har eg vore usikker på om ordninga faktisk gjeld endå. Derfor var det ekstra kjekt då eg fekk telefonen, seier den glade vinnaren.

Friska opp både kjøkken og bil

Snekkevåg jobbar på Fjaler sjukeheim. Ho kan fortelje at ho er oppteken av miljøet både på arbeidsplassen og på heimebane.

— Sortering er viktig og eg pleier alltid å sjekke kva som skal kor før eg kastar det. Dette er eg også oppteken av på jobb. Det er kanskje nokon som syns eg masar litt, men det må dei berre tole, ler ho.

Gevinsten er utbetalt og pengane har allereie kome godt med.

— Bilen fekk seg storservice og så har eg fått meg nye kjøkkenstolar. Resten går inn i matbudsjettet.

Lettente pengar

Totalt blir det gjenvunne 12.000 tonn drikkekartong kvart år. Å gjenvinne brukte kartongar er langt mindre energikrevjande enn å produsere papir frå nytt trevirke. Derfor er gevinsten stor når folk leverer drikkekartongane i retur.  No er det heller ingen krav om å lage kubbe for å vinne toppgevinsten, men ein kan skrive namn på kvar enkelt kartong.

— Det er jo litt jobb med det, men det er lettente pengar. Denne premien gav meg i alle fall meirsmak til å fortsette å skrive namn og telefonnummer på kartongane, seier den heldige vinnaren.

— Dette var rett og slett utruleg stas. Eg er heilt overvelda og kjem utan tvil til å fortsette å sortere framover.

Fortsett å sortere - det er pengar å hente

 — Returkartonglotteriet er ei super ordning for å få samla inn tomme kartongar. Vi har fått høyre at det er fleire som er usikre på om ordninga eksisterer enno. Med ein fersk vinnar i nærleiken håpar vi at vi har fått stadfesta det, seier Marie Tefre Birkeland, som er kommunikasjonsrådgjevar i Sunnfjord Miljøverk.

Drikkekartongar er laga av jomfrueleg fiber. Det vil seie at det er første gong materialet er i bruk. Derfor kan fibrane i ein innlevert drikkekartong ha sju-åtte liv framfor seg, i forhold til dømes ein pizzakartong eller eska til frukostblanding.

— Det er jo hovudsakleg miljøet som vinn på denne ordninga, men det er ein stor bonus å kunne lokke med ein potensiell pengepremie til dei som vil sortere. Og så er det jo ei spenning med det. No håpar vi at endå fleire vel å skrive namn og nummer på kartongane sine framover. Er vi heldige kan vi få ein ny vinnar allereie i neste kvartal, avsluttar Birkeland.

Dette er Returkartonglotteriet

• Alle kan delta og vinne i lotteriet – privatpersonar, bedrifter, organisasjonar, skular, barnehagar, idrettslag og liknande.

• Kvart år blir det delt ut premiar for til saman 1,6  millionar kroner. Det er fordelt på premiar på 10 000 kroner, og fire premiar på 100 000 kroner.

• Skriv namn og nummer på kartongen, og legg den i dunken for papir.

• Kartongar trekkast frå 84 forskjellege plassar i landet. Kvar plass skal trekke mellom 1 til 7 kubbar eller enkeltkartongar avhengig av innbyggartal. Til saman maks 188 kvart kvartal. Kubbane eller enkeltkartongane går vidare til nasjonal trekking.

• Det er Grønt Punkt Norge som står bak ordninga.

Kva skjer med kartongane?

• Utsortert drikkekartong blir pressa til ballar og vert selt til papirfabrikkar.

• Kartongane vert kverna opp og tilsett vatn. Papirfibrane reinsast, tromlast og pressast, og blir til nye papp – og papirprodukt med minimalt bruk av kjemikaliar.

• Innsamlingsmålet for drikkekartongar er å oppnå så høg gjenvinningsgrad som mogleg for å redusere miljøavgifta.

Nye reglar på gjenvinningsstasjonane

Frå 1. juni er det ikkje lengre mogleg å levere avfall i mørke eller svarte sekkar på gjenvinningsstasjonane til Sunnfjord Miljøverk.  

—    Vi vil påpeike at endringa ikkje vert innført for å gjere det vanskeleg for kundane, men for å få betre kontroll over kva som blir levert inn hos oss og dermed sikre betre sortering, seier Tore Dvergsdal, som er dagleg leiar i Sunnfjord Miljøverk.    

I snitt har gjenvinningsstasjonane i Sunnfjord besøk av nærmare 55 000 kundar i året. Det er enorme mengder avfall som kjem inn, og innføring av gjennomsiktige sekkar er eit konkret grep på å sikre at dette avfallet blir sortert riktig.

—  Vi er sjølvsagt på staden for å hjelpe kundane, men det er utfordrande når vi ikkje ser kva som ligg i sekkane. Mange har samla avfall over fleire månadar eller år. Då er det fort gjort å gløyme det som ligg i botnen av sekken, forklarar Dvergsdal.    

Sorter slik du vil – så lenge innhaldet er synleg

Dei nye reglane gjeld alle typar avfall, også kjeldesortert avfall og hageavfall. Vi oppmodar til å bruke éin sekk per avfallstype. Det er sjølvsagt i orden å levere avfallet i ein open tilhengar eller på andre måtar der avfallet er synleg.

—    Poenget er at operatørane skal få oversikt over det som blir levert, og saman med kunden sortere i riktig konteiner på gjenvinningsstasjonen . Vi veit at farleg avfall og elektronikk ofte vert kasta i restavfallet, noko som i verste fall kan føre til brann. Med betre oversikt over innhaldet, får vi sortert dette riktig frå starten av. Dette vil også gjere arbeidskvardagen til dei tilsette tryggare.

Plastsekkar kan du kjøpe i butikkane

Gjennomsiktige plastsekkar får du kjøpt hos dei fleste daglegvarebutikkar og byggevareforhandlarar rundt om. Vi påpeiker at SUM-sekkane til plastemballasje ikkje skal brukast til anna avfall enn plast.  

—    Dette kjem vi til å vere strenge på. SUM-sekkane er spesiallaga til plastsortering, og dei skal berre nyttast til det formålet. Vi kjem ikkje til å ta imot avfall som er sortert i desse sekkane med mindre dei inneheld plast.

Meir til gjenvinning

EU stiller krav om 65 prosent materialgjenvinning innan 2035. Då er det viktig at vi sorterer riktig i alle ledd. Dei siste åra har mange renovasjonsselskap innført krav om gjennomsiktige sekkar på gjenvinningsstasjonane sine, med stor suksess.

—    Dei melder om tryggare og enklare kvardag for operatørane, meir riktig sortering og høgare grad av materialgjenvinning, altså at avfallet vert om til nye råvarer og nye produkt.

Det tar tid å endre vanene til folk, og det har vi forståing for. Derfor vil vi gradvis fase ut dei svarte sekkane som mange brukar i dag.

—    Vi oppmodar alle om å allereie no å starte sortering i gjennomsiktige sekkar, avsluttar Dvergsdal.

Bli med på ryddeaksjon!

Eit sikkert vårteikn er at det dukkar opp boss i naturen i takt med snøsmelting. Derfor inviterer Hold Norge Rent til nasjonal ryddedag 16. mars.

Målet med Vårryddedagen er å ha ein felles ryddedugnad når bosset kjem fram etter vinteren. Kvart år bidreg Vårryddedagen til å fjerne store mengder avfall frå norsk natur, før ferdselsforbundet trer i kraft 15. april.

Rydd i ditt nærområde

Rydd langs elvar, i fjorden, på stranda, i skogen eller kor enn du måtte ønske. Poenget er å få fjerna mest mogleg avfall som ligg rundt omkring i naturen. Samle saman venner, kollegaer, familien eller kanskje naboen, og bli med på dugnad.

Bruk det du har heime

Det er dessverre leveringsvanskar med materiell, men bruk det du har heime. Ein berepose eller plastsekk gjer susen! Alt som vert samla inn kan de levere gratis på gjenvinningsstasjonane våre. Fint om de plukkar bosset i gjennomsiktige sekkar. Då får vi betre oversikt over innhaldet i sekkane.

På Hold Norge Rent sine heimesider kan du lese meir om Vårryddedagen 2024.